أنا وانتي لمّا نموت 
قصّتنا مش خالده 
بين البشر فِ الأرض 
كل اللي سبقونا 
عاشوا الحياه بالطّول 
وعاشوا الحياه بالعرض 
أنا وانتى لو على فرض 
كمّلنا للآخر 
تِفتكري نوصل فين ؟
الفكره إنّ الناس 
مش شاغله بالها ب مين 
بيحبّ أصلاً مين
عارفه انّ فيه اتنين
زيّك وزيي زمان 
حاولوا ومفيش فايده ؟ 
طاب عارفه لو قايده 
كلّ الصوابع نور 
لاجل الحكايه تدّوم 
بردَك هييجى اليوم 
والناس هينسونا 
الدنيا مجنونه 
وانا وانتى مش عاقلين 
عارفين ومش عارفين 
نقنع قلوبنا تسيب 
عارفين بإنّ العيب
كان فينا مِ الأوِّل 
كإن إيه لزومها نحبّ 
لما الغياب طوّل ؟ 
بقلم / محمود نعمةالله
