قالوا عليك سُلطان
لكن بدون مماليك
قالوا عليك سجّان
والسجن أصلاً ليك
يا كل شىء ف إيديك
مغشوش ومتكسّر
الحلم كان فـ عينيك
جاهز ومتفسّر
دلوقتى تتحسّر
على كلّ حلم انزاح
كلّ السكك أقصر
سكة حبيبتى براح
قلبِك دا كان فوّاح
و روايحُه بتجيبنى
صوتِك دا كان مدّاح
بسّ السَمَع ,, عابنى
يا كُلّ شوق صابني
مِحراب حبيبتى بعيد
وَجَع القلوب نابنى
مـِ الحُبّ والمواعيد
أنا قلبى لسّه بليد
مانجِحش غير فـِ الخوف
أنا جرحى لسّه جديد
مفتوح و ع المكشوف
أنا لسّه عندى ظروف
تمنعنى إنّى اشتاق
قلبِك دوا موصوف
وانا قلبى فيه الدّاء
يا كُلّ كام مُشتاق
لحبيب مابيشوفهوش
وَسَع الطريق لو ضاق
جايز ماتتقابلوش
يا كُلّ حدّ مالوش
ولا حدّ يسأل فيه
دَمعِة عينيك هاتحوش ؟
لكن هتفرق إيه ؟؟
يا كُلّ حدّ ناسيه
آسف على التقصير
يا كُلّ بيت هامحيه
علشان ,, كتبتُه كتير
آسف على التأخير
اللّوم على المزاجات
يا عارفه إيه بيصير
مع قلبى فـِ المسافات
حبك دا شىء بالذات
مالهوش أوان ويموت
يا أوضح العلامات
وِسط الطريق بتفوت
يا كل شيء مظبوط
فيكى ومتفصّل
عِشقِك كما الملكوت
وانا قلبى بيوصَّل
قلبك ,, دا متأصّل
عمره ما كان غشّاش
يا كل شيء ببلاش
جيبته وما كان له لزوم
أنا قلبى ليه مابقاش
قادر يبان ف الزووم
بقلم / محمود نعمة الله