"علامات تذكير"
والجرح قديم / بس بينزف ! 
علامات وجروح 
وحاجات بتروح 
والماضي قديم / بس بيعزف 
من ماضي وراح للمستقبل ! 
علامات تذكير لسه بتقبل 
بالقسمه الـ بتكسر فينا 
وان كان عالجرح انا هستحمل 
لكن عَالفِكر فَـ مين فينا يستحمل جرح وفكرة موت ! 
"علامات تذكير" لسه بتكسر 
فـ حواجز خوف / ورا وش كسوف 
ورا كَم ظروف مَطليِ ببَسمَه ! 
والماضي اساساً كان حاضر 
كان فعل مُضارع مُستسلِم 
مُتخيل انُه اكيد هيدوم ! 
علامات وعيون 
والذكري ديون 
والداين بايع للمديون !
والبيعه ان كات حَبة اوهام
فـَ انا كُنت الخام من اوجاعهم 
الفكره ازاي بنحب سنين 
وفـ غمضة عين بنودعهم ! 
هل بنبيعهم !
ولا باعونا؟!
هل كل الـ مابينهم مَوعِد 
او وَعدي و وَعدها كِسرونا
حَولنا الحُب لمكرونه 
والبُعد سَلقنا علي الهادي! 
_
بنعاند روحنا وبنمَيّل 
لهدايا قديمه وش ات سَيء 
والكلمه بتُبرِز وتُبين 
ان الموضوع حُب اُحادي !
بنداري علي جروحنا ببسمَه 
وبنكسف روحنا بشوق قاضي 
علي كل الحُب الـ فـ جوفنا ! 
علامات تذكير بتوقفنا 
وبتمنع سيرنا لارضينا
فيه اراضي بتعليَ وبتمَوِج
واراضي بتتلون بينا
فيه اراضي
بتشبه لسفينه
وسفينه بتمشي علي اراضي!
الخلق بتحزن عالفاضي
وبتنسي فروضها المعلومه
الخلق لو اهتَمِت اكتر
كان خير الفجر هَيِكفينا
يا سفينه بتغرز فـ الطينه
و تعَلِم فـ الارض وتندم
بنفكر فـ الـ مجاش لينا
وبننسي الـ علينا ونسأل
الخَلق بتسأل "اِي بيحصل"؟
مع ان الرد بيسبقُه فعل!
علامات تذكير بخلاف حُبك
بتشدك تاني لنفس البُعد
والبُعد يشدك للماضي !
دايره وبتلف وبتحَوِّد
البنت الـ تحبك صونها
والحُب الـ يهد اجتنبُه !
الموقف دانك بإدانتُه
والبنت بتحصُدني مَواجِع
بتحبَك بس مَحبيتهاش
وبتعمل شاش ليها وراجع
بتدور علي حاجه تقولها !
انا حابك
بس مَبوعدكيش
اني ابقيَ عريس
او حد يجوز حتي تحبيه
انا حد غريب ِتهاديه بـ بُعاد او بالفُرقه !
انا حد يجوز قتلُه بحُرقه
علشان اخطائي بتتكرر !
كل اما الزكري تفوقني
بلمحها طشاش او بتصور
هل ممكن ترجع من تاني !؟
بتحب وجودها لكن بتخاف
تتحب وتصبح مجّاني
او جاني عليها عشان خواف !
الحُب قتلني عشان الناس
والناس اتقتلت بالتدريج
بنسَمي حاجات تِكسَر فِـ بنات
وبنات بتسيئ لولاد بحاجات
والكل بيحزن بالسنوات
علشان عداد الحُزن يزيد !
حَملتوا الحُب مساوئ ليه ؟
والسوء كان مصدر حضراتكم !
كل الـِ اتحَوِل من جارح لحبيب مجروح ..
هيضَل يبوح
ونواحُه هيوصل لقلوبكم
بخلاف الباب المتوارب / ويضل يعافر ويا الباب !
ويدمع لكن بالايام
او بالاسابيع
او من اكتوبر ونوفمبر لربيع
ألوانُه مبتدمعش !
علامات تذكير بتجَرَّح بس/ مبتسصلحش !
علامات تذكير / بقلم يوسف الصياد
